ورد وادهم الجزء الرابع
وهو عارف من زمان ان أدهم بيحب وردة وبيغير عليها، بس في نفس الوقت بيفكر في سمعة نسرين لو أدهم مخطبهاش بشكل رسمي بعد الصورة اللي اتسربت ومالي الجامعة كلها.
جده فكر شوية وبعدين اتنهد وقال بص يا أدهم .. ده شرف بنت يا ابني، البنت ملهاش ذنب، وصورتها مالية الجامعة .. وانت راجل.. والراجل لازم يحافظ على شرف البنت اللي اتحطت في الموقف ده بسببه حتى لو غصب عنه.. انت لازم تخطبها
أدهم رفع راسه مصدوم من كلام جده اخطبها؟
جده قال بحزم ايوه.. انا بنصحك يا أدهم انك تخطب نسرين.. عشان سمعتها
جده كمل كلامه وقال بجدية كلنا هنيجي الميعاد بالليل عشان نخطبها بشكل رسمي.. انا هكلم ابوك وامك وكلنا هنروح لبيت العميد
أدهم قاعد مش بيفكر غير في وردة، وشها وهي بتعيط وهو ماشي مع العميد مش رايح من باله.
جده كان فاهم اللي جواه وقرب منه وحط ايده على كتفه وقال كل شيء قسمة ونصيب يا أدهم .. ووردة بنت عمك لسه صغيرة وقدامها سنين الجامعة لحد ما تكبر وتفهم.. انما نسرين هي المناسبة ليك، دكتورة زيك ومن سنك وهتفهمك
أدهم مش مقتنع بالكلام بس سكت، وفضل يفكر جواه انه ممكن يخطب نسرين دلوقتي عشان كلام الناس وسمعتها، وبعدين يبقى يفهمها ان الخطوبة دي عشان بس كلام الناس.. وبعد فترة يفسخوا
هز راسه لجده وخرج من مكتب جده وهو مهموم وطلع على فوق، كان عايز يدخل أوضة وردة ويتكلم معاها بس معندوش كلام يقوله لها دلوقتي، هيقولها ايه؟ اتحرك على أوضته على طول وقفل الباب عليه.
بعد ساعة، دخلت أم وردة أوضة بنتها وهي بتصحيها وقالت لها قومي يلا يا وردة قومي البسي عشان تيجي معانا
وردة قعدت على السرير وهي بتحاول تفتح عينيها اللي وارمة من العياط وقالت بصوت مبحوح اجي معاكم فين؟
أمها قالت لها وهي بتعدل السرير جدك قالي كلنا نلبس عشان هنروح نخطب لأدهم.. النهاردة بالليل
وقعدت أمها تكمل كلامها باستغراب وتقول مش فاهمة جه منين موضوع الخطوبة بالسرعة دي.. ده مكانش قايل حاجة
وردة أول ما سمعت الكلمة حطت وشها في المخدة على طول عشان دموعها متظهرش قدام والدتها وقالت بصوت مخنوق مش هروح معاكم
بس والدتها قالت لها بحزم مينفعش يا وردة.. جدك مأكد عليا ان العيلة كلهم هيروحوا ومينفعش حد يتأخر
وردة مسحت دموعها بسرعة وقالت لوالدتها بصوت واطي حاضر يا ماما انا هلبس وآجي
والدتها خرجت وسابتها لوحدها في الأوضة وقفلت الباب.
وردة قامت وقفت قدام المرايا وبصت لنفسها، عينيها حمرا ووارمة من العياط، قالت لنفسها وهي بتعيط ايه اللي انتي عاملاه في نفسك ده.. فوقي
قامت لبست فستان اسود بسيط وربطت شعرها ديل حصان، حاولت تحط شوية ميكب عشان تداري أثر العياط بس معرفتش.
أدهم نزل من أوضته لابس بدلة سودة وشكله متوتر، لقى كل العيلة واقفين منتظرينه تحت في الصالة.
لسه هيتكلم سمع خطوات وراه على السلم.
لف وبص.. شاف وردة نازلة ولابسة الفستان الاسود، ملامحها بريئة وناعمة، عيونها بتلمع من الدموع، وشفايفها وخدودها حمرا من كتر العياط.
أدهم فضل باصص لها ومش قادر يشيل عينه من عليها.
وردة نزلت وهي مش بتبص عليه خالص، عدت من جنبه كأنه مش موجود وراحت وقفت جنب والدتها.
الجد بص عليهم كلهم وقال بصوت هادي يلا يا ولاد.. يلا بينا عشان منتأخرش
بيروحوا بيت العميد، ووردة طول الطريق قاعدة في العربية ساكتة ومش بتتكلم ولا بتبص من الشباك حتى، حاطة وشها في الأرض.
بيدخلوا بيت العميد، والعميد وأهل بيته بيرحبوا بيهم بسعادة كبيرة، ونسرين بتكون لابسة فستان رقيق ولونه فاتح وشكلها فرحان وبتضحك من قلبها.
كلهم بيقعدوا في الصالون، والجد بيبدأ الكلام بصوت وقور ويطلب ايد نسرين لأدهم، والعميد بيوافق وهو مبسوط.
أدهم طول القعدة عيونه على وردة وهي قاعدة ساكتة بتبص في الأرض ومش مركزة مع حد، ماسكة شنطتها
وفجأة الباب اتفتح ودخل شادي أخو نسرين، شاب طويل ووسيم ، دخل سلم عليهم كلهم ورحب بيهم واحد واحد.
وأول ما قعد، لفت انتباهه البنت الجميلة اللي لابسة فستان اسود وقاعدة لوحدها وساكتة، فضل طول ما هو قاعد عيونه عليها ومش قادر يشيلها من عليها، معجب بيها من أول نظرة.
الجد ووالد نسرين بيتفقوا انهم يعملوا حفلة خطوبة صغيرة بسرعة عشان يلموا الموضوع ويسكتوا كلام الناس في الجامعة.
روايات الكاتبة ملك إبراهيم
وردة مبتقدرش تستحمل أكتر من كده، الكلام عن الخطوبة والحفلة وجع قلبها، قامت فجأة وقالت بصوت متوتر معلش.. انا تعبانة شوية وعايزة أغسل وشي.. هو الحمام فين؟
الكل سكت وبص عليها، شادي قام بسرعة وقال بلهفة اتفضلي معايا هوصلك
أدهم بيبص عليهم بصدمة وهما بيخرجوا مع بعض من الصالون، عينه برقت من الغيرة، فضل يهز رجله بعصبية وهو منتظر رجوع وردة بسرعة، ومش مركز في أي كلام تاني بيتقال عن الخطوبة.
وردة خرجت مع شادي، وصلها لحد الحمام، دخلت بسرعة غسلت وشها بمياه ساقعة عشان تفوق وتبطل عياط، وبصت لنفسها في المرايا وقالت اهدي بقى.. اهدي
طلعت لقت شادي لسه واقف مستنيها قدام الحمام وساند على الحيطة.
شادي ابتسم وقال بقيتي أحسن؟
وردة قالت بتوتر آه
